ទំព័រដើម / លោក សូ សារុំ
ចាងហ្វាងរងរដ្ឋបាលអប់រំ ការិយាល័យកណ្តាល
លោក សូ សារុំ កើតនៅឆ្នាំ១៩៨១ នៅខេត្តតាកែវ។ លោកទទួលបានសញ្ញាបត្រមធ្យមសិក្សាគរុកោសល្យ នៅឆ្នាំ២០០១ និងបរិញ្ញាបត្រសេដ្ឋកិច្ចអភិវឌ្ឍន៍ និងអភិវឌ្ឍន៍ជនបទ នៃសាកលវិទ្យាល័យមេគង្គកម្ពុជា ក្នុងឆ្នាំ ២០១០។
លោកបានចូលបម្រើការងារក្របខណ្ឌរដ្ឋនៅថ្ងៃទី១ ខែតុលា ឆ្នាំ២០០៣ រហូតដល់ថ្ងៃទី២៣ ខែកុម្ភៈ ឆ្នាំ២០០៦។ នៅថ្ងៃទី២៣ ខែកុម្ភៈ ឆ្នាំ២០០៦ លោកបានចូលបម្រើការងារនៅអង្គការដើម្បីភាពញញឹមនៃកុមារ ដែលមានមូលដ្ឋាននៅក្នុងទីក្រុងភ្នំពេញ មានតួនាទីជាគ្រូបង្រៀនពេញម៉ោង លើមុខវិជ្ជាគណិតវិទ្យា និងរូបវិទ្យា សម្រាប់សិស្សថ្នាក់ឆ្នាំសិក្សាមូលដ្ឋាន ត្រៀមចូលមជ្ឈមណ្ឌលបណ្តុះបណ្តាលវិជ្ជាជីវៈ នៃអង្គការដើម្បីភាពញញឹមនៃកុមារ។
នៅឆ្នាំ២០០៨ លោកត្រូវបានដំឡើងតួនាទីជាជំនួយការផ្ទាល់ប្រធានសាលាថ្នាក់ឆ្នាំសិក្សាមូលដា្ឋន ទទួល បន្ទុកលើការងាររដ្ឋបាលសាលា និងការងារសិក្សាធិការសិស្ស។ នៅថ្ងៃទី១៨ ខែតុលា ឆ្នាំ២០១៥ លោកក៏បានចូល បម្រើការងារនៅសាលារៀន អន្តរទ្វីប អាមេរិកាំង ដែលមានតួនាទីជាប្រធានផ្នែកលេខាធិការកម្មវិធីសិក្សា។ បច្ចុប្បន្នផែ្នកនេះបានផ្លាស់ប្តូរឈ្មោះពីផ្នែកលេខាធិការកម្មវិធីសិក្សាទៅជាផ្នែករដ្ឋបាលសាលារៀន អន្តរទ្វីប អាមេរិកាំងវិញ។
គោលបំណងផ្នែកនេះ គឺដើម្បីបំពេញសេវាកម្មទូទៅសម្រាប់តម្រូវការរៀន និងបង្រៀនឱ្យបានល្អ និងប្រកប ដោយប្រសិទ្ធិភាពខ្ពស់ ជាពិសេសការរៀបចំឯកសារគតិយុត្តិផ្សេងៗដែលជាតម្រូវការរបស់ការិយាល័យអប់រំខណ្ឌ មន្ទីរអប់រំ យុវជន និងកីឡា រាជធានីភ្នំពេញ និងនាយកដ្ឋានចំណេះទូទៅឱ្យស្របតាមក្របខណ្ឌច្បាប់គុណវុឌ្ឍិជាតិ។
ខ្មែរ
អង់គ្លេស